აბაშიძეების ოჯახი

                                         

ინტერვიუ პედაგოგ რუსუდან აბაშიძესთან

-ქალბატონო რუსუდან, თქვენ აბაშიძეების ოჯახს წარმოადგენთ. გვიამბეთ თქვენი წინაპრების შესახებ, ვინ იყვნენ ისინი, რას საქმიანობდნენ და როდიდან ცხოვრობს თქვენი ოჯახი ქუთაისში?

აგაბო აბაშიძე

-ჩემი ოჯახი ქუთაისში 100 წელზე მეტია, რაც ცხოვრობს. წარმოშობით, ჩემი წინაპრები ზესტაფონის რაიონის სოფელ ქვედა საზანოდან არიან. ბაბუას, აგაბო აბაშიძეს, განჯაში ჰქონდა დამთავრებული სასწავლებელი, რკინიგზის განხრით. ქუთაისში ჩამოვიდა XX საუკუნის 10-იან წლებში. მუშაობდა თავისი სპეციალობით. თავიდან ცხოვრობდა ნაქირავებ ბინაში ოჯახთან ერთად, 1920 წელს მან სახლი ააშენა დღევანდელი  ვიქტორ კუპრაძის (ყოფილი ძერჟინსკის) ქუჩაზე.

                        

                          ზინა ალავიძე

    

                 ტიტე აბაშიძე

  












ბებიას - ზინა ალავიძეს დამთავრებული   ჰქონდა ქუთაისის რეალური სასწავლებელი. მას ჰყავდა 4 შვილი, 2 მცირეწლოვანი დაეღუპა. ცოლ-ქმარმა აღზარდა ორი ვაჟი: ტიტე და შოთა აბაშიძეები. უფროსი ვაჟი - ტიტე, სამწუხაროდ, უცოლშვილო იყო. იგი 1942 წელს ირანში დაიღუპა პროფესიული მოვალეობის შესრულებისას - სამხედრო მფრინავი გახლდათ.

შოთა აბაშიძე

  მამაჩემი - შოთა აბაშიძე, პროფესიით ისტორიკოსი იყო. დაამთავრა რკინიგზის მე-12 საშუალო სკოლა,  სამხედრო- სავალდებულო სამსახურის შესრულების დროს მოუწია II მსოფლიო ომმა. დაბრუნდა შინ 1947 წელს (ევროპის გათავისუფლებაში მიიღო მონაწილეობა), შემდეგ დაასრულა ქუთაისის პედინსტიტუტი. 1951 წლიდან სიცოცხლის ბოლომდე, 1985 წლამდე, მუშაობდა ქუთაისის პირველ სკოლაში ისტორიის მასწავლებლად.

კლავდია კობეშავიძე- აბაშიძისა

  დედა, კლავდია კობეშავიძე, პროფესიით ეკონომისტი იყო, მას დამთავრებული ჰქონდა ... ივ. ჯავახიშვილის სახელმწიფო უნივერსიტეტის ეკონომიკის ფაკულტეტი. დედის ოჯახიც XX საუკუნის დასაწყისიდან ცხოვრობდა ქუთაისში. დედა და მამა ომის შემდგომ შეხვდნენ ერთმანეთს ჩვენს ქალაქში და დაქორწინდნენ 1949 წელს. დედა 1955 წლიდან სიცოცხლის ბოლომდე მუშაობდა ქუთაისის სააფთიაქო სამმართველოში საფინანსო განყოფილების გამგედ.

    ჩემი ძმა, ნუგზარ აბაშიძე, დაიბადა 1950 წელს ქალაქ ქუთაისში. 1967 წელს წარმატებით დაასრულა ქ. ქუთაისის  ვ. მაიაკოვსკის სახელობის I საშუალო სკოლა და ჩაირიცხა ქუთაისის ნიკო მუსხელიშვილის სახელობის პოლიტექნიკურ ინსტიტუტში, სამრეწველო და სამოქალაქო მშენებლობის ფაკულტეტზე. სწავლის დამთავრების შემდეგ მუშაობდა სხვადასხვა სამშენებლო სამმართველოში ხელმძღვანელის თანამდებობაზე და რიგით მშენებელ ინჟინრად. იგი ამჟამადაც განაგრძობს მუშაობას. ჰყავს მეუღლე და 2 ქალიშვილი.

ზინაიდა ალავიძე , კლავდია კობეშავიძე
და შოთა აბაშიძე ბავშვებთან 
 ნუგზარ და რუსუდან აბაშიძეებთან

  მე, რუსუდან აბაშიძე, დავიბადე 1952 წელს ქუთაისში. 1967 წელს დავასრულე ქუთაისის ვ.  მაიაკოვსკის სახელობის პირველი საშუალო სკოლა.  პარალელურად ვსწავლობდი მელიტონ  ბალანჩივაძის სახელობის სამუსიკო სასწავლებლის საფორტეპიანო სპეციალობაზე, რომელიც დავასრულე 1972 წელს. 1974 წელს ჩავირიცხე თბილისის ივ. ჯავახიშვილის სახელმწიფო უნივერსიტეტის დასავლეთ ევროპის ენებისა და ლიტერატურის ფაკულტეტზე გერმანული ენისა და ლიტერატურის სპეციალობით, რომელიც დავასრულე 1979 წელს. 1991 წლიდან ვმუშაობ ქ. ქუთაისის აკაკი წერეთლის სახელობის N1 საჯარო სკოლაში გერმანული ენის მასწავლებლად. მყავს მეუღლე და ორი შვილი.

რუსუდან აბაშიძე ძმისშვილებთან
- ნინოსა და სოფიოსთან ერთად

  მე ბედნიერი ვარ, რომ ჩვენი დიდი ოჯახის შთამომავლობაც ქუთაისში აგრძელებს ცხოვრებასა და მოღვაწეობას. აქ დამკვიდრდა ჩემი ძმიშვილი ნინო აბაშიძე თავისი ოჯახით. ნინო ინგლისური ენის პედაგოგია, ზრდის ქალიშვილს.

  ქუთაისში ცხოვრობენ ჩემი შვილებიც: გიორგი ფორჩხიძე, პროფესიით ინფორმატიკის სპეციალისტი, თავისი ოჯახით - მეუღლითა  და ორი ქალიშვილით. ჩემი  ქალიშვილი - თამარ ფორჩხიძე, გერმანული ენის სპეციალისტია. ისიც თავისი ქმარ-შვილით ჩვენი ოჯახის ქუთაისურ ტრადიციას აგრძელებს.

  რაც შეეხება ჩემს უმცროს ძმისშვილს, სოფიო აბაშიძეს, იგი ჩვენი სკოლის საუკეთესო კურსდამთავრებულთა შორისაა. რამდენიმე წელი ცხოვრობდა აშშ-ში. სწავლა დაასრულა თბილისში, თავისუფალ უნივერსიტეტში, ამჟამად მეუღლესთან, ინგლისელ სატი ხანგურასთან, ერთად ცხოვრობს და მოღვაწეობს ლონდონში, „Ernst and Iang” აუდიტორულ კომპანიაში ერთ-ერთი განყოფილების ხელმძღვანელად.

-რას ნიშნავს თქვენთვის ქუთაისი და სტატუსი ქუთაისელობა?

-ჩემთვის ქუთაისი მთელი ცხოვრების ქალაქი და სიცოცხლის საზრისია. იყო ქუთაისელი, ეს, ჩემი აზრით, ყოველგვარი გადაჭარბების გარეშე, სიამაყეცაა და დიდი ბედნიერებაც.

შოთა აბაშიძე  და  კლავდია კობეშავიძე შვილებთან